Молебные прошения но Сугубой ектении и заупокойные прошения на Панихиде 28 августа 2017 г.

12 Июля 2017 201

Молебные прошения но Сугубой ектении

28 августа 2017 г.

Помилуй нас Боже, по велицей милости Твоей, молим Ти ся, услыши и помилуй.

Еще молимся о Великом Господине и Отце нашем Святейшем Патриархе Кирилле и о преосвященных митрополитех, архиепископех и епископех, и всей во Христе братии нашей.

Еще молимся о Богохранимей стране нашей, властех и воинстве ея, да тихое и безмолвное житие поживем во всяком благочестии и чистоте.

Еще молимся Тебе, Богу, Спасителю нашему, о еже милостивым оком призрети на ны, память ныне творящих в столетнюю годовщину Священнаго Собора Церкве нашея о трудех и подвизех приснопамятных членов его, о еже сохранити и нам веру православную невредиму и непреобориму от расколов, ересей, неверия и всех наветов вражиих, рцем вси, Милосерде Господи, услыши и помилуй.

Хор: Господи, помилуй (трижды).

Еще молимся Господу Спасителю нашему, о еже приятии исповедание и благодарение нас, недостойных рабов Своих, о благодеяниях, яже излиял еси на Церковь Русскую от лет древних, наипаче же в мимошедшем веце, спасая ю от бед и скорбей и от разделений восставляя, и припадаем, и славословие Тому, яко Богу приносим и умиленно вопием: яко Милостив, исполни во благих прошения наша, прилежно молим Ти ся, Всесильный Творче, услыши и помилуй.

Хор: Господи, помилуй (трижды).

Еще молимся, о еже приятися, яко кадилу благовонному, молитвам сонма мучеников и исповедников за веру и правду страшныя страдания и мученическую кончину претерпевших и Христа ради в годы гонений подвизавшихся, да Церковь Русскую утвердит, нас же всех в единомыслии соблюдет, рцем вси Господи, Спасителю наш, услыши и милостивно помилуй.

Хор: Господи, помилуй (трижды).

Еще молимся Тебе, Господу Богу нашему, о еже благосердием и милостию призрети на виноград сей, егоже насади и сохрани от всех наветов вражиих Десница Твоя, о еже и в предняя лета даровати наследию Твоему мир и безмятежие, да не умалится и не поколеблется Русь святая, и да славится в ней Трисвятое имя Твое, рцем вси, Благосерде Господи, услыши и милостивно помилуй.

Хор: Господи, помилуй (трижды)

Святейший Патриарх:

Услыши ны, Боже, Спасителю наш, упование всех концев земли и сущих в море далече, и милостив, милостив буди Владыко о гресех наших и помилуй ны. Милостив бо и Человеколюбец Бог еси, и Тебе славу возсылаем Отцу, и Сыну, и Святому Духу, ныне и присно и во веки веков.

Хор: Аминь.

Протодиакон: Паки и паки во умилении сердец наших, Господу помолимся.

Святейший Патриарх велегласно глаголет молитву сию:

Боже великий и непостижимый, Отче Безначальный‚ Собезначальный Сыне и Душе Соприсносущный, спасаяй погибающыя, животворяй мертвыя и дивным Твоим промыслом управляй всяческая! Приклони ухо Твое с высоты святыя Твоея, и приими от нас, смиренных и недостойных рабов Твоих, имже велие Твое от бед и всегубительства спасение явил еси, сердцем и устами возносимая Тебе благодарственная сия моления, исповедания и славословия. Не по беззакониям нашим сотворил еси нам, Господи, ниже по грехом нашим воздал еси нам, но призрел еси на многия труды и усердные молитвы верных рабов Твоих членов Священнаго Собора Церкви Русския, архипастырей, пастырей, монашествующих и мирян в годы гонений пострадавших и все упование свое на Тя возложивших.

Помози нам, Господи, помять сего славнаго Твоего милосердия тверду и непрестанну имети в себе, яко да Тобою утверждаеми и ограждаеми, всегда, якоже днесь, поем и славословим Имя Твое святое. Сподоби нас в вере, любви и единении пребывати, пагубныя разделения и расколы преодолевати, да Дух Твой Благий почиет на нас. Подаждь верным людем Твоим мир и тишину, пастырям святыню, правителем суд и правду, законам силу и исполнение, и Православней веры утверждение. Пробави, Премилосердный Господи, милость Твою ведущим Тя и непознавшим Тебе явлен буди, да от восток солнца до запад вси народы едиными усты и единым сердцем воскликнут Тебе гласом радования:

Слава Тебе, Богу Спасителю нашему, во веки веков. Аминь.

Заупокойные прошения на Панихиде

28 августа 2017 г.

Еще молимся о упокоении душ верных рабов Божиих, членов Священнаго Собора Церкве нашея, архипастырей, пастырей, монашествующих и мирян, от нихже мнози в годину гонений на Церковь Христову за Православную веру страшныя страдания, истязания и мученическую кончину претерпеша, от болезней, глада и хлада в темницах, узах и горьких работах в изгнании скончашася, и о еже проститися им всякому прегрешению, вольному же и невольному.

Яко Ты еси воскресение и живот и покой усопших верных рабов Божиих членов Священнаго Собора Церкве нашея архипастырей, пастырей, монашествующих и мирян, от нихже мнози в годину гонений на Церковь Христову за Православную веру страшныя страдания, истязания и мученическую кончину претерпеша, в темницах, узах и горьких работах в изгнании скончащася, Христе, Боже наш, и Тебе славу возсылаем со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков.

Отпуст панихиды:

Воскресый из мертвых, живыми и мертвыми обладая Христос Истинный Бог ваш, молитвами Пречистыя Своея Матере, святых славных я всехвальных Апостол, преподобных я богоносных Отец наших и всех святых, души от нас преставльшихся приснопамятных рабов Божиих, членов Священнаго Собора Церкве нашея, архипастырей, пастырей, монашествующих и мирян, от нихже мнози в годину гонений на Церковь Христову, за Православную веру страшныя страдания, истязания и мученическую кончину претерпеша, в темницах, узах и горьких работах в изгнании скончашася, в селениях праведных учинит, в недрах Авраама упокоит, с праведными сопричтет, а нас помилует, яко Благ и Человеколюбец.

Вечная память:

Во блаженном успении вечный покой подаждь Господи приснопоминаемым верным рабом Твоим, членам Священнаго Собора Церкве нашея архипастырям, пастырям, монашествующим и мирянам, от нихже мнози в годину гонений на Церковь Христову за Православную веру страшныя страдания, истязания и мученическую кончину претерпеша, в темницах, узах и горьких работах в изгнании скончашася и сотвори им вечную память.